මම හුදෙක් කොමියුනිස්ට්වාදියෙකුවත් ධනවාදියෙකුවත් නොව සරල හදාරන්නෙක්මි. සියල්ල පෙනෙන ලෙසවත් ඇහෙන ලෙසවත් පිළිනොගෙන ඒ තුළ ගැඹුරටම ගොස් විචක්ෂණව තේරුම් ගැනීමට උත්සහ දැරීමේ එක්තරා පිස්සුවක් නිසා මම බොහෝ වේලාවට දුක් විදින්නෙමි. මා හට ජීවත් වීමට සිදු වී ඇති මෙම අතිශය ධනවාදී ක්රමය තුළ පන නල ගැටගසා ගැනීමට දරන උත්සහය දන්නේ මා පමණකි.
වෘත්තියෙන් ඉංජිනේරුවෙකු වූ මා හට මෙම ක්රමයේදී කම්කරුවා හුදෙක් වේතනයක් ලබන මැෂිමක් ලෙස පමණක් සළකා ඔවුන් හා හාද නොවී මහා ලොක්කෙකු සේ ඔවුන් අතර ගැවසෙමින් මාගේ උපරිම වෙර දමා වෙහෙසෙමින් මෙලෝ හසරක මොලයක් නැති සල්ලි කාර ධනපතියෙකුට උපරිම ලාභයක් ලබා දීමට කටයුතු කිරීම මහා අවුලක් සේ මට දැනේ. මම ද කම්කරුවා ද එකී ධනපතියාගේ සපත්තු අඩියට යට වී ඇති බව තේරුම් ගත් මා, මාගේම ආදරණීයන්ගේ දුක් කම්කටලු සහ බැදීම් හමුවේදී අසරණ වන අවස්ථා බොහෝමය. සල්ලි කාරයා තවදුරටත් සල්ලිකාරයෙකු වන දුප්පතා තවදුරටත් දුප්පත්ම වී යන මෙම ක්රමය තුල සල්ලි කාරයෙකු වීමට නම්, ආදරය, කරුණාව, පරාර්ථකාමී බව වැනි උතුම් ගතිගුණ පසෙකලා හුදෙක් ලාභය පසුපස හතිදාගෙන දිවීමට සිදු වන බව මා තේරුම් ගෙන අවසන්ය. මාගේ පියාද මාගේ සීයා ද අනෙකුත් අහිංසක ආදරණීයන් ද මෙම උතුම් ගතිගුණ සමග තනිවී තවමත් දුප්පතුන්, ණය කරුවන් බවට පත් වී සිටීමට හේතු ද මා තේරුම් ගෙන අවසන්ය.
ලෝකය අද වන විට මහා දියුණුවකට පත් වී ඇත්තේ මෙකී ධනවාදය නිසාමය. කොමියුනිස්ට්වාදය මේ මුලු ලොව පැවතුනහොත් මෙවන් දියුණුවක් අත් කර ගැනීමට අපට නොහැකි බව නොඅනුමානය. නමුත් එසේ වුවහොත් අප සියල්ලම මීට වඩා සතුටින්, ආදරෙන්, සමගියෙන් සිටිනු ඇතැයි මට සිතේ. මා සිහින මැවුවේ මාගේ බුද්ධිය, මාගේ උගත් කම හුදෙක් ධනපතියෙකුගේ ලාභය උදෙසා වෙහෙසවීමට නොව මුලු මහත් ලෝකයක් වෙනුවෙන් පූජා කිරීමට වුව ද එකී ධනපතියාගෙන්ම බැට කෑ මාගේ අසරණ ආදරණියන් වෙනුවෙන් නැගී සිටීමට උත්සහ දැරීම එක්තරා ආත්මාර්ථකාමී බවක් ද එක්තරා පරාර්ථකාමී බවක් ද වේ.
දිනෙක නුඹත් මමත් ආදරෙන් හිනැහෙමු.... කෙතරම් අසීරු වුව ද
නිතරම අපි සිහින දකිමු.... පියමං කරනට
ඒ සුන්දර ලොව කරා!
- අර්ජුමාන්
No comments:
Post a Comment