දළඹුලන්තයේ ආදර කථාවක්

​දළඹු පෙම්වතිය ඇයගේ සමනළ පෙම්වතාව අමතමින්

"බලන්න මම දැන් අපේ දළඹු පවුලේ ඉහලම තැනකට ඇවිල්ලා... අපේ ගමේ කවුරුත් මම වගේ ඉහලට ඉගෙනගෙන නෑ... මට දැන් හොඳ පිලිගැනීමක් තියෙනවා... උගත් බුද්ධිමත් ලස්සනට ඉංග්‍රීසි කථා කරන්න පුලුවන් දළඹුවෙක් මම... පාර්ලිමේන්තු වුනත් යන්න පුලුවන්... පොලීසියෙ කන්ටැක්ස් වුනත් තියෙනවා.... දැන් අපිට කසාද බඳින්න පුලුවන්... ඒත් ඔයා දැන් වෙනස් වෙලා නෙ... මොනාද මේ පිහාටු කෑලි... මම කියනවට අපි එක පාරක් යමු ඩොක්ටර් කෙනෙක් හම්බෙන්න... මම දන්න හොඳ ඩොක්ටර්ස් ලා ඉන්නවා... දැන් මම දළඹු ඩොක්ටර්ස් ලා එක්කමයි වැඩ කරන්නේ... ඔය පිහාටු ටික එයා අයින් කරලා දායි ඔපරේශන් එකක් කරලා... නැත්තං ඉගිලෙන්න බැරි වෙන්න හිරිවට්ටයි... මම සල්ලි දෙන්නං... ඊට පස්සෙ ආයෙත් ඔයා ඉස්සර හිටපු මගේම දළඹු පැටියා වෙයි... හාද?"

සමනළ පෙම්වතා අහක බලමින්

"ඔයා ඉහල තැනකට ආවා කිව්වට ඔයා තාම දළඹුවෙක් නෙ... ඔයාගෙ දළඹු අයියා මේ ළඟදිත් මූණ ඉදිමෙන්න ගැහුවා නේ... මම දන්නවා ඔයාට තාම ඒ තුවාල රිදෙනවා කියලා... ඒත් ඔයා ඒවා ඉවසගෙන සමාව දීලා ඉන්නවා... මොකද ඔයා භයයි පිහාටු ඇවිල්ලා ඔයා සමනළයෙක් වෙනවට... නේද... කී පාරක් ඔයාගෙ පිහාටු කැපුවද ඒගොල්ලො... දැන් ඔයත් උන්ගෙම එකෙක් වෙලා මගේ පිහාටුත් කපන්න එනවා..."

දළඹු පෙම්වතිය තවත් උත්සහයක් දියත් කරමින්

"මේ බලන්න... ඔය විකාර විදියට හිතන එක නවත්තන්න.... මට කියලා දුන්නේ එංගලන්තෙන් ආපු සුදු දළඹු අයියා කෙනෙක්... එයා කිව්වෙ පොඩ්ඩක් සෙල්ෆිශ් වෙන්න කියලා... ඔහොම හිතලා අපිට පොහොසත් දළඹුවො වෙන්න බෑලු... මම නං දැන් ඕවා හිතන් නෑ... මට සුපිරි දළඹු යාලුවො ටිකක් ඉන්නවා... මම දැන් ගොඩාක් සමාජශීලියි... දළඹු සමාජයට ඕන විදියට මම ඉන්නවා... ඔයා ඉතිං වෙන කවුරුත් කියන දේ අහන් නෑනෙ... ඔයාගේ මතේමනේ... අනික ඔය අලුත් පාට පාට පිහාටු ආවා කියලා... ඔයාට පොඩ්ඩක් ඉගිලෙන්න පුලුවන් වුනා කියලා... ඔයා දළඹුවෙක් කියන එක අමතක කරන්න එපා... අපේ අයියා බලන්න... එයාට කිසිම පිහාට්ටක් නෑ... පිහාට්ටක් ආවත් ටක්ගාලා කපලා දානවා... ඒත් අද එයා කොච්චර සාර්ථක දළඹුවෙක් වෙලාද... එයාට සෙල්ලම් බඩු ගොඩාක් තියෙනවා... එයා කියන්නේ මමත් එයාගෙ සෙල්ලම් බඩුවක්ලු... මම නැති වෙයි කියලාලු ගහන්නේ... ආදරේටනේ... කොහොමත් සෙල්ලම් බඩු වැඩිපුර තියෙන කෙනානේ දිනන්නේ... බලන්න අද ඔයාට කිසිම සෙල්ලම් බඩුවක් නෑ... පාට පාට පිහාටු ටිකක් තියෙනවා... ඔහොම සමනළයෙක් වෙන්න ගියොත් නං දළඹු තාත්තා ඔයාට සෙල්ලම් බඩු අරන් දෙන එකක් නෑ... යමුද ඩොක්ටර් ගාවට මගේ දළඹු පැටියෝ..."

සමනළ පෙම්වතා එක පාර ඉහලට පියාසර කරමින්

"ආදරය... ඔයාට පේන්නෙ නැද්ද... ඔයත් දවසක සමනළයෙක් වෙනවා කියලා... මේ බලන්න... ඔයාට ඔහොම පොළොවෙ ඉඳන් පේනවාට වඩා... ගව් ගාණක් ඈත මට පේනවා... ලස්සනයි... හරිම සුවිසල්... ඔව් මම දළඹුවෙක් තමා... ඒත් මම පියාඹන දළඹුවෙක්... දැන් මගේ ඇඟට වඩා පිහාටු තමයි ලොකු... පිහාටු කැපුවොත් මම නිකංම නිකං මස් වැදැල්ලක් විතරයි... මට බෑ ආයෙ බිමට බහින්න... එනවානං අහසේ හම්බෙමු අපි... පොළොවේ ගනුදෙනු නැතා... හරී..."

සමනළ පෙම්වතා ඈත අහසේ පියාසර කරමින් කරනම් ගසමින් සුළඟේ දැවටෙමින් ගී ගයමින්

"කියන්න ඔයාගෙ දළඹු ඩොක්ටර්ස්ලට ගිහිල්ලා... මට ඒගොල්ලො ගැන දුකයි කියලා... එක හුස්මකින් මේ හැමදේම නැති වෙනවා කියලා... සීයා මැරෙද්දි මට හිතුනේ එහෙම... එක තප්පරයයි... නැද්ද... මැරුන එකාට මේ මුකුත් නෑ... අපි තමා මිනිය කරේ තියං පල්ලි පන්සල් හදාගෙන මැරුන දළඹුවෙක්ට වන්දනා කර කර ඉන්නේ... ඉවසන්න ආදරය... ඉඩ දෙන්න... ඔහොම තමුන්ටම නපුරු වෙන්න එපා... එක පාරක් ඔය පිහාටුවට එන්න ඉඩ දෙන්න... මහා දෙයක් වෙන්නෙ නෑ... බොරු භයක් නෙ තිබ්බෙ කියලා හිනාවක් යනවා මිසක්... අනික ඔයානෙ කිව්වෙ මම සමනළයෙක් වගේ කියලා ඉස්සර... ඉතිං මම පිහාටු එන්න ඉඩ දුන්නා... ඔව් මට දළඹු ලෝකෙ මුකුත් විච්චූරන නෑ තමා... ඔයා දැකලා නෑනෙ මගෙ සමනළ ලෝකේ තියෙන දේවල්... තරහද මගෙ ආදරය..."

දළඹු පෙම්වතිය ඉහල අහස දෙස බලමින්

"මට එන්න බෑ ඔයා ඉන්න තැනට... මට හැමදාම ඕන වුනේ දළඹු අම්මෙක් වෙලා... දළඹු පැටව් එක්ක... සදාකාලිකව ජීවත් වෙන්න... ඔයා තමා මට ඇවිල්ලා කිව්වෙ අපි සදාකාලිකව ජීවත් වෙන්නෙ නෑ අපි හැමෝම මැරෙනවා කියලා... ඒත් හැමවෙලේම මැරෙනවා කිය කිය ඉන්නත් බෑනේද මගෙ පැටියෝ... කෝ බිමට බහින්න දැන්... අද තියෙනවා දළඹුලන්තේ අවුරුදු උත්සවේ... අපෙ අයියා තමා ග්‍රීස් ගහ නගින්නේ... මම ඔට්ටුවක් ඇල්ලුවා මගේ දළඹු යාලුවෙක් එක්ක... එයා කොඩිය ගන්නවා ශුවර්... අපි ඔය අතීතේ දේවල් අමතක කරලා දාලා යමු... මම ඔයාට කෝට් එකක් දෙන්නං... ඒක ඇන්ඳම ඔය පිහාටු ටික හංගගන්න පුලුවන් වෙයි... මම ඉන්නවනේ ඔයා එක්ක... භය වෙන්න එපා... මම දැන් හොඳට දන්නවා දළඹුලන්තෙ ඉන්න ඕන විදිය... කෝ එන්නකො දැන්..."

සමනළ පෙම්වතාගෙ කටින් උල් දත් මතු වෙමින් විරිත්තමින්

"ඔයා දන්නවා මට කවුරුහරි වද දෙද්දි මේ ඩ්‍රැකියුලා දත් එනවා කියලා... මාව ලේ විකා බොන යක්සයෙක් කරන්න තමා ඔය හදන්නෙ... ඔයා යන්න... ගිහිල්ලා අවුරුදු කුමරිය වෙන්න... මම එන්නෙ නෑ ඕවාට... ඔයාට ඔටුන්නක් හම්බෙයි... ඒක දාගත්තට පස්සෙ ඔයාට හම්බෙයි සුපිරි ඉස්කෝලෙකට ගිය, ස්ථීර ජොබ් එකක් කරන, ඉන්ශූවරන්ස් තියෙන කඩවසම් දළඹු මහත්තයෙක්... මට වද දෙන්න එපා... යන්න... ගිහින් උන්ට ඕන දේම ඔයා කරන්න..."

හිටි හැටියේ මහා වැස්සක් ඇද හැලෙයි

අකුණු පිට අකුණු

මහා ජල ගැලීමක් එන්න වගේ

සමනළ පෙම්වතා සුළඟට ගසාගෙන යන හැඩයි

දළඹු පෙම්වතිය ඉහල අහස දෙස බල බල සමනළ පෙම්වතාව සොයයි

සමනළ පෙම්වතා කුණාටුව මැද අතුරුදහන් වුනු හැඩයි

එක පාර ඇදහැලුනු මහා වැස්ස නිමවනතුරු දළඹු පෙම්වතිය නැවතත් තම දළඹු ගුල ඇතුලට රිංගාගෙන ඉකි ගසමින් අඬන්නට පටන් ගනියි

"මේක නං මහා දේව සාපයක්, මහා පොළොව නුහුලන අපරාධ කරපු දේශයකලු මෙහෙම වහින්නෙ, විනාසයි, අපි හදාගත්ත පොහොසත් ලස්සන දළඹු ජීවිතය විනාසයි... අනේ දෙවියනේ... දෙයියන්ටවත් මේවා පේන් නැද්ද..."

සෙසු දළඹුවන් රංචු ගැසෙමින් තැන් තැන් වල අවනඩුවක් විමසමින් සිටිනු පෙනේ. 

අර්ජුමාන් 

31.08.2026