ස්වයං නිරෝධායන ඩයරියෙන් පිටුවක්:
නැගිටින්නෙ එකට, ඒකත් පට්ට අමාරුයි, තව නිදාගත්තොත්, එක්කො චූ බරට බොක්ක පිපිරෙනව, නැත්තං බඩගින්න වැඩි වෙලා ගැස්ට්රයිටිස් එනව, අම්ම නින්ද සම්බන්ධෙන් බනිනව, තාත්ත කෑම සම්බන්ධෙන් බයිනව, රොටි, කොළ කැද, කිරිබත්, පිට්ටු සියල්ල, මං නැගිටිද්දි එක්ස්පයර් වෙලා, අම්ම නැවතත් බයිනව, තේක නිවිල, නිවිල ඇල් වෙලා, ඇල් වතුරටත් වඩා නිවිල, දැන් දවල්ට කන වෙලාව, ඔහොම නිදාගත්තොත් මේ ළමයට වෙනම අමාරුවක් හැදෙනව, උදේ නැගිටල වත්තෙ වැඩක් කරොත් මොකද වෙන්නෙ, මේ ගෙදර වැඩ හෝ ගාලා, අවුරුදු විසිඅටක බැනුං ඇසීමෙ මනා පළපුරුද්දෙන් මා ඉගෙන ගත් කරුණ නම්, නිශ්ශබ්දව සිටීමයි, ගොඩක් ඉමෝශනල් වීම උම්ම එකකින් හෝ හුරතල් වීමෙන් පාලනය කරගත හැක, ගේම ඉල්ලීම මරාගෙන මැරෙන බෝම්බයකට වඩා දරුණුය!
සෑම දිනයක්ම අලුත් ආරම්භයකි කියල, නානව පැය ගාණක්, කිසීම හදිස්සියක් නෑ, නාන ගමන් බාත්රූම් එකත් සුද්ද කරනව, රැවුල් කපනව, ෂැම්පො ගානව, ඒක හෝදනව, කන්ඩිශන එකක් තිබ්බොත් ඒකත් ගානව, ආයෙ නානව, නාල නාල එළියට එද්දි ආයෙ ෆුල්ම ෆ්රෙශ්, අලුත් කලිසමක් ඇදල, කාමරෙ අතු ගාල, ඇද අස් කරල, මේසෙ අස් කරල, කොරෝන අප්ඩේට්ස් ටිකක් ටීවි එකෙ බලල, දවල්ටත් කාල, ඇදට ඇවිල්ල, ෆෑන් එකත් දාල, ඔන්න දවස පටන් ගන්න යන්නෙ..
පටන් ගන්න කියන්නෙ, එහෙම පටන් ගැනීමක් නෑ ඉතිං, කරන්න දේකුත් නෑනෙ, ෆෑන් එකෙ සනීපෙට ගොඩාක් දේවල් හිතෙන්න ගන්නව, ජනේලෙන් එහා පැත්තෙ ගහට කුරුල්ලො එනව, එක එක ජාතියෙ උන් එනව, මේ ටිකෙ අලු පාට ඩයල් එකක් එනව, පරයියෙක් වගේ, බෙල්ලෙ දම් පාට පටියක් වගේ තියෙනව, මං හිතන්නෙ ඌ පිටරටක එකෙක්, ඌ මං දිහා බලං ඉන්නව, මං ඌ දිහා බලං ඉන්නව, ඌ ආයෙ පල්ලෙහ බලනව, පල්ලෙහ එහා ගෙදර ගැමුණු අයියගෙ කැත කලු පූස, මේ ටිකෙ අපේ පූසිට ලයින් දානව, අපේ එක්කෙනාට හීට් එක ඇවිල්ලලු, එයත් දැන් ඕන එකෙක් කමක් නෑ කියන තැනට පත්වෙලා, එළියෙ කලු පූසා ඇතුලුව පූසො දහදෙනෙක් මෙයාව ටාගට් කරන් ඉන්නෙ, ඔක්කොම මැරයො, චන්ඩි, කුඩු කාරයො, කුළියට ළමා අපචාර කරන උන්, ඒක නිසා මෙයාව කොහෙත්ම එළියට යවන් නෑ, එයාගෙ මානුශීය අයිතිවාසිකම් උල්ලංඝනය කිරීමක් වෙන්නත් පුලුවන්, ඒත් ඇස් පනාපිට ලිංගික අපයෝජනයකට ලක් වෙන්න දෙන්න බෑ, ඩොක්ටර්ව හම්බෙන්නත් බෑ, ඇදිරි නීතිය කවද ඉවර වෙයිද දන්නෙත් නෑ, කෝකටත් මිතුරි එකක් දෙනව ඩේලි, ප්රෙග්නන්ට් වෙලා ආවොත් අම්ම මට හදාගන්න කියනව පැටවුන්ව, මමනෙ ගෙනාවෙ, ඒක වෙන්න දෙන්නත් බෑ, කලු පූසෙක් කෑ ගහන එක මූසලයි ලු, බ්ලැක් කැට් සමහර සංස්කෘති වල බ්ලෙසින් එකක් කියනව, ඒත් ලංකාවෙ ඒක මූසලයි ලු, පෙරේද ඌ කෑ ගැහුව හෙන හයියෙන්, අපේ පූසිත් ගේ අස්සෙ ඉදන් අඩනව, මම උන් දෙන්න මැද ඉදන් ස්වයං නිරෝධායනයට ලක් වෙනව, ටික ටික කෑ ගැහිල්ල නැති වෙල ගියා, ඈතින් අකුණු ගහන සද්දයක් ආව, ස්වභවදහම කැලඹුනාවත්ද, වැස්සා කියන්නකො ලස්සනට, හීනියට පටන් අරන් වැස්සා පිලිවෙලකටම, පූසන්ගෙ ඇඩිල්ලත් ඉවරයි, මමත් බබා වගේ නිදාගත්ත.
සියල්ල සම්බන්ධයිද, නැත්තං සියල්ල ඉබේ වෙනවද, මම ඒව සම්බන්ධ කරගන්න උත්සහ කරනවද, පූස කෑ ගැහුව නිසාද වැස්සෙ, වහින නිසාද පූස කෑ ගැහුවෙ, උන්ට අපිට වඩා සංඛ්යාත පරාසයක් අහු වෙනවනෙ, ඉතිං උන්ට දැනෙනව වෙන්නත් පුලුවන් වහින්න යන්නෙ කියල, නැත්තං පූසගෙ හීට් එක වැඩි වෙලා ඌට ලව් එකක් ඕන වෙල කෑගහුව වෙන්නත් පුලුවන්, ඒත් වෙනදට වඩා හයියෙක් කෑගැහුවෙ ඇයි, වහින්න යන හින්ද ඌ ගොඩක් රොමෑන්ටික් වෙලා කෙල්ලෙක් නැති දුකට ඇඩුව වෙන්නත් පුලුවන්, මේ අවකාශය ඇතුලෙ වෙන පොඩි සිද්ධියක් මුලු අවකාශයටම බලපෑම් එල්ල කරනවද, හරියට පෙත්තටම වතුර පුරෝපු බේසමකට ඇගිල්ලක් දැම්මම බේසම පුරා යන තරංග වගේ, ඔව් වෙන්න පුලුවන්, චීනෙ හරි කොහෙ හරි එක මිනිහෙක්ට කෝවිඩ්-දහනමය හැදීම එක සිද්ධියක්නං, අද මම මේ වෙලාවෙ මෙහෙම රිලැක්ස් එකෙ ගෙදර ඉදගෙන මේ වගෙ බහුබූත ලිවීම කියන්නෙ තව සිද්ධියක්නං, අනිවාර්යයෙන් ඒ සිද්ධි දෙක සම්බන්ධයිනෙ, කොරෝන කේස් එක ස්ප්රෙඩ් උන්නැත්තං මට නිවාඩු හම්බෙන්නෙත් නෑ, එහෙනං මම මේ වෙලාවෙ ඉස්කෝලෙ, අන්තිම පීරියඩ් එකේ උගන්නනව, ඒක වෙනමම සිද්ධියක්, මේක නිකං ඇල්ගොරිදම් එකක් වගේද, පිලිවෙලකට වෙන සිද්ධි දාමයක්ද, අපේ අතේ කිසීම කොන්ට්රෝල් එකක් නැද්ද, අපි ගන්න තීරණයකින් සියල්ල වෙනස් වෙන්නෙ නැද්ද, ඒත් ඒ ගත්ත කියන තීරණයත් ඒ මොහොතෙ තිබ්බ සියලුම තත්වයන් වල සම්ප්රයුක්ත අවුට්පුට් එකක් වෙන්න බැරිද, එහෙනං ආයෙත් මේ සිද්ධි සියල්ල ෆිල්ම් රීල් එකක් වගේද, එහෙනං අනාගතය කියන සිද්ධියත් මේ වෙලාවෙ පවතිනවද, අනාගතය වෙනස් කරන්න බැරිද, එහෙනං අතීතයත් තාම පවතිනවද?
මගෙ වටේ තියෙන සියල්ල පොඩි පොඩි කෑලි වලට බෙදන් ගියොත්, බෙදල බෙදල ආයෙත් බෙදුවොත්, ඒ කියන්නෙ අනිත් පැත්තෙන්, අපි මේ දකින රියැලිටි එක සූම් ඉන් කරන් ගියොත්, අපි යනව ඇටොමික් ලෙවල් එකකට, ඒ කියන්නෙ පරමාණු කියන ස්ටේජ් එකට, අපිට හම්බෙනව පරම-අණුව, ඒකත් ආයෙ සූම් ඉන් කරොත්, අපිට තේරෙන්න ගන්නව, මේ පරමාණුව කියන්නෙ එක තැනක එකම විදියකට තියෙන ගල් කැටයක් වගේ අයිටම් එකක් නෙමේ, ශක්තියේ එක ස්වරූපයක් කියල, පොඩි ඉලෙක්ට්රිකල් සර්කිට් එකක් කියල හිතුවට අවුලක් නෑ, ඒ කිව්වෙ, මේකෙ තියෙනව ආරෝපණ, එකකට එකක් ප්රතිවිරුද්ධ ආරෝපණ දෙකක්, ධන, රින, මේ දෙන්න හරියටම එක හා සමාන, එකම වගේ, ඒත් ප්රතිවිරුද්ධ ආරෝපණ ඇති දෙන්නෙක්, මේ දෙන්න එකිනෙකාට ගොඩක් ආකර්ශනය වෙන දෙන්නෙක්, ඒත් පරමාණුවෙ තියෙන ව්යුහය අනුව මේ දෙන්නට ලං වෙන්න බෑ, මේ ඈත් වීම ඇතුලෙ ගැබ් වෙනව ලොකු ශක්තියක්, ආරෝපණ අතර ඇති වෙනව ලොකු විභවයක්, පරමාණුව කියන්නෙ තාමත් හරියටම ඉරි දෙක ගහපු නැති සබ්ජෙක්ට් එකක් වෙලා, අතීතයෙ ඉදන්ම ඒකෙ ව්යුහය එක එක උන් එක එක විදියට පැහැදිලි කරා, කොහොමහරි, මේ යුනිවර්ස් එකේ අපි ස්කේල් එක වෙනස් කරොත්, ඒ කියන්නෙ ඇටොමික් ස්කේල් එකකට වෙනස් කරොත්, අපිට තේරෙන්න ගන්නව, මම, කොරොනා හැදුන පලවෙනි එකා, කලු පූස, මේ ඇද, ෆෑන් එක මේ ඔක්කෝගෙම බේස් එක මේ පරමාණුව නැත්තං ආරෝපණ අතර විභවය කියල. එහෙම බැලුවම මුලු යුනිවර්ස් එකම ලොකූ ඉලෙක්ට්රිකල් සිස්ටම් එකක්, සර්කිට් එකක්, ඒකෙ පොඩි පොඩි එලෙමන්ට්ස් වල ක්රියාකාරීත්වයන්, ටෙක්නිකලි, මුලු සිස්ටම් එකටම බලපාන්න පුලුවන්.
ධන රින, ගෑනු පිරිමි, කලු සුදු, හොද නරක, ස්වර්ගය අපාය, වම දකුණ, ධනවාදය කොමියුනිස්ට්වාදය, ප්රජාතන්ත්රවාදය ඒකධිපතිවාදය, මේ සියල්ල, මේ මුලු පද්ධතියෙම පැවැත්ම, ද්වීත්වයක් අතර ඇති විභවයක්ද, විභවයක් කියන්නෙ ශක්තියක්, පද්ධතියක් පැවැතීමට ශක්තියක් අවශ්යය, එහෙනං ඒකද ශක්තිය, ශක්තියේ විනාස වීමක් හෝ ආරම්භයක් නැත, ස්වරූපය මාරු වීමක් පමණක් සිදු වේ, එහෙනං මැටිරීයල් එකක, නැත්තං හෞතික ද්රව්යක ගැබ් වෙන ශක්තියේ ස්වරූපය මොක්දද, ඒක මාරු වෙන්නෙ මොන ශක්ති ස්වරූපයටද, අපි මැරුනම ඇගේ සියලුම සෛල පොලොවට මාරු වෙනවද, පිච්චුවම මොකද වෙන්නෙ, ඒ ශක්ති-ස්වරූප මාරු වීම මොකද්ද, සෛලයක තියෙන ඩීඑන්ඒ එක අපේ ප්රොග්රෑම් කෝඩ් එක වගේ නං, මැරිල පොලොවට දිරද්දි, ඒ කෝඩ් එකට අනුව සෛල වල තියෙන ශක්තිය වෙන ස්වරූපයකට මාරු වෙනවද, පිච්චුවම ඒක ලොකු තාප ශක්තියක් විදියට හැරෙනවද, අලු කියන්නෙ මොනාද, හින්දු ආගමෙ අලු ගංගාවක පාකරල යවන එකේ විද්යාත්මක පසුභිමක් තියෙනවද, මුලු හින්දු ආගමම විද්යාත්මකයිද, ආගම් විද්යාත්මකව අපිට පැහැදිලි කරල දෙන්න බැරි ඇයි, පුලුවන්ද, ඒත් ඇයි ආගම් නායකයො ඒව නොකර සල්ලි හොයන්නෙ, ගේම් ගහන්නෙ, පොලිටික්ස් කරන්නෙ.
නිදාගන්න ඕන නිසා පාන්දර නිදාගන්නව මිසක්, ලොකු උවමනාවක් නැති වෙලා, නිදාගන්නවට වඩා මේ බහුබූත කල්පන කිරීමෙන් මම ලෙඩෙක් වෙයිද, ඉමියුනිටි කෙල වෙලා කොරොන හැදෙයිද, කොරෝන කියන්නෙ කන්ස්පයරසි එකක්ද, ලෝක යුද්ධයක් යනවද ශේප් එකේ, ගේමක්ද මේ, ඒත් මේ මොකද්ද, වෛරස් එකක ඇත්තම මූල ආරම්භය මොකද්ද... ද ද ද ද ද ද ද?
හරි දැන් ඇති, දවස පුරාම ඕක තමා වෙන්නෙ, හිතල හිතල හිතල හිතල මහ පාන්දර, මල පෙරේතයෙක් වගේ නිදාගන්නව හැරෙන්න මාත් කියල මොනා කරන්නද, ඒකත් ලොකු ප්රශ්නයක්, ඒකත් හිතන්න වෙනව වෙනම, දැන් අමාරුයි, ඔලුවත් රිදෙනව කල්පන කරල, හිතුව ඇති ඕයි දැන් නිදාගනින්, හරි ඔන්න නිදා ගත්ත, හරි, හ්ම්ම්, ශූබට් ගෙ සෙරනේඩ් අහනවද, මොකද කියන්නෙ, නෑ හුත් නිදාගනින් දැන්, පාන්දර එලාම් එකත් වැදුන, ශික් කොච්චර පජාතයෙක්ද තමුසෙ, වෙනදට මේ වෙලාට ඇහැරෙනව, දැන් තමුසෙ පිස්සෙක් වෙයි, නිදාගනින්, හා.
ඊළග පිටුවට..
- අර්ජුමාන්
No comments:
Post a Comment